Старшыні Бабруйскага гарвыканкама выставілі абвінавачанне, яго ўзялі пад варту

Старшыні Бабруйскага гарвыканкама Андрэю Каваленку выставілі абвінавачанне і ўзялі пад варту. Яго дзеянні кваліфікавалі як "атрыманне хабару асобай, якая займае адказнае становішча" (ч. 3 арт. 430 КК). Як інфармуе прэс-служба Следчага камітэта, абвінавачанне выставіла Галоўнае ўпраўленне па расследаванню злачынстваў у сферы арганізаванай злачыннасці і карупцыі цэнтральнага апарата СК. Следчыя і аператыўнікі высвятляюць усе абставіны здзейсненага злачынства.

Пра затрыманне старшыні Бабруйскага гарвыканкама стала вядома 15 лістапада. На сайце Міністэрства ўнутраных спраў паведамлялася, што чыноўнік на працягу доўгага часу атрымліваў ад прадстаўнікоў суб'ектаў гаспадарання і грамадзян хабар (як у беларускіх рублях, так і ў валюце) "за спрыяльнае вырашэнне пытанняў, якія ўваходзяць у яго кампетэнцыю".

Андрэю Каваленку 46 гадоў. Ён з'яўляецца ўраджэнцам Калінінградскай вобласці Расіі. На пасадзе кіраўніка Бабруйска працаваў са жніўня 2014 года.