Сусветныя брэндынгавыя агенцтвы ацанілі брэнды Мінска

Ніводзін з "брэндаў Мінска", у тым ліку і афіцыйныя сінія палоскі ад кампаніі Instid, не атрымаў месца на конкурсе брэндаў гарадоў, які прайшоў на фэсце "Open". Міжнароднае журы — дырэктары і ўладальнікі брэндынгавых агенцтваў з усяго свету — аддало першае месца брэнду ўкраінскага "Кіраваграда". Мінскім жа далі суцяшальныя дыпломы фіналістаў — відаць, каб нікога не пакрыўдзіць.

Некаторыя сябры прафесійнага журы сышліся на думцы, што ў брэндзе горада лагатып — не галоўнае. Нельга зрабіць брэнд і сказаць, што горад брэндыраваны.

"Вы думаеце, нейкія лагатыпы прымусяць мяне сказаць сябрам, што Мінск — круты горад? І я сам захачу яго пабачыць зноў?" — кажа Хертур Смарасон з Ісландыі.

Валянцін Лопан з Агенцтва дзелавых сувязяў лічыць, што канцэпцыя разумнага горада, якую прапанавала кампанія Instid, — камплімент для мінчан, які яны не прынялі. Бо ў горадзе ёсць парадоксы, якія адбываюцца не з-за вялікага розуму.

Нават калі пагадзіцца, што лагатып — не галоўнае, ці не атрымаецца так, што далей за лагатып, якім залепяць усе тралейбусы, не пойдзе? Цікавімся ў Наташы Гранд з Instid.

"Мы не плануем заляпіць увесь Мінск сінімі палоскамі. Мы адлюстравалі, як гэта можа быць выкарыстана. Людзі павінны зразумець, што гэта нейкая варыятыўнасць колераў. У нас была задача абазначыць напрамак, колер і ў якім рэчышчы гэта павінна ісці. І адкрыць для інтэрпрэтацый. Гэта не тое, што павінен гарвыканкам зверху спускаць. Мы хочам, каб гэта пайшло сапраўды ад людзей".

Кіраўнік партала TUT.by Юрый Зісер сам стварыў некалькі брэндаў і лічыць, што лагатып акурат і мае значэнне. Таму вельмі важна, каб ён быў добрым.

"Калі залепяць тралейбусы, усё і пачнецца. Таму што людзі адчуюць гэты брэнд. Горад убярэ яго ў сябе. І калі брэнд абраны правільна — гэта адаб'ецца і на нашым самаадчуванні, і на эканоміцы ў выніку, на ўсім... калі брэнд будзе добрым".

Сінія палоскі многія мінчане не прынялі. Але так заўсёды бывае, калі з'яўляецца нешта новае, лічыць Юрый Зісер.

"Але тут была рэакцыя прафесійнай супольнасці. Па-першае, гэта ўвогуле не лагатып — гэта фірмовы стыль. І распрацоўшчыкі самі казалі, што лагатыпа няма, толькі фірмовы стыль. Па-другое, з пункту гледжання прафесійнага журы і майго асабістага, гэта сіняя зебра сваіх функцый не выконвае. Яна ніяк не асацыюецца з горадам ні ў каго: ні ў жыхароў, ні ў турыстаў. А заказчык — упраўленне турызму Мінгарвыканкама. Значыць, гэта ўсё рабілася для турыстаў. А я не бачу турыстаў у гэтых сініх палосках. Сінія палоскі для інвестара, што таксама вельмі сумнеўна".

Наташа Гранд лічыць спрэчкі, якія пачаліся вакол брэнду, дасягненнем. Маўляў, іншыя праекты ніхто не абмяркоўвае, таму пра іх забудуць.

"Калі паказваюць нейкія праекты, ну так, прыгожанька, міла і забылі — гэта не працуе. Калі мы пачыналі, Мінск не быў прадметам дыскусій. А цяпер гэта тэма вельмі горача абмяркоўваецца. Людзі пачалі абмяркоўваць, у чым Мінск, навошта, куды Мінск ідзе. Гэта значыць, мы націснулі на правільную кропку".

Брэнд Кіраваграда

Фота: Еўрардыё, brandminsk, linii