Сувязь суддзі Шмыта з Беларуссю мае даўнюю гісторыю — прэм'ер Польшчы

Суддзя Томаш Шмыт мае з Беларуссю даўнія сувязі, і гэта выклікае заклапочанасць. Так прэм'ер-міністр Польшчы Дональд Туск пракаментаваў справу суддзі, які папрасіў прытулак у Беларусі.

"Няма сумневаў, што мы маем справу не з адзінкавым учынкам, а з праблемай, якая пачалася вельмі даўно", — цытуе Gazeta.pl словы кіраўніка польскага ўрада.

На думку Туска, выпадак са Шмытам палягае не ў сферы маралі або медыйных сенсацый — гаворка пра дзяржаўную бяспеку: "Трэба аддаваць сабе справаздачу ў тым, што службы, у дадзеным выпадку беларускія, працавалі з асобай, якая мела прамы доступ да міністра юстыцыі, несла адказнасць за разбурэнне судовай сістэмы ў Польшчы, мела доступ да інфармацыі, да якой ніводная разведка не магла мець доступ".

Сувязь Шмыта з Беларуссю, па словах польскага прэм'ера, "мае даўнюю гісторыю", што павінна выклікаць "максімальную заклапочанасць".

Як распавядала Еўрарадыё, 6 траўня ў Мінску польскі суддзя Томаш Шмыт даў прэс-канферэнцыю. Ён заявіў, што пакінуў Польшчу па палітычных матывах і мае намер прасіць палітычнага прытулку ў Беларусі.

У Польшчы Шмыт фігураваў у скандале са злівам кампрамату на сваіх калег, якія не падтрымлівалі судовыя рэформы, арганізаваныя польскай кіроўнай партыі "Права і справядлівасць" (ПіС). Дагэтуль абвінавачанні па гэтай справе не былі нікому выстаўленыя.