Turkish Airlines падоўжыла адмену рэйсаў Стамбул-Мінск да 30 чэрвеня
Турэцкая авіякампанія Turkish Airlines зноў падоўжыла адмену рэйсаў са Стамбула ў Мінск і назад — цяпер да 30 чэрвеня ўключна.
Гэты маршрут пралягае над рэгіёнамі Украіны, у якіх ідзе вайна, таму яны закрытыя для пралёту грамадзянскіх самалётаў.
Праз санкцыі, раней уведзеныя супраць Беларусі і кампаніі "Белавія", Стамбул застаецца адным з нямногіх хабаў, праз які беларусы могуць паляцець у еўрапейскія краіны. "Белавія" лятае туды, абмінаючы небяспечны рэгіён. Палёт пры гэтым доўжыцца каля 6,5 гадзіны замест звычайных чатырох.
19 красавіка беларуская авіякампанія адкрыла чартарную праграму ў Турцыю рэйсам да Анталіі. А з 30 траўня адкрываюцца рэйсы на курорт Бодрум: яны будуць адбывацца 1 раз на 10 дзён.
