У Адміністрацыі прэзідэнта паабяцалі змагацца з адпіскамі чыноўнікаў
Супрацоўнікі адміністрацыі створаць працоўную групу па вывучэнні праблемы адпісак у адказ на скаргі. У яе ўвойдуць прадстаўнікі пракуратуры і судоў.
Пры Адміністрацыі прэзідэнта абяцаюць стварыць працоўную групу, якая разгледзіць праблему адпісак чыноўнікаў. Такое абяцанне атрымала праваабаронца Тамара Сяргей, якая прыйшла на сустрэчу з кіраўніком адміністрацыі Аляксандрам Косінцам.
Але на сустрэчу з ім Тамара так і не патрапіла. Абяцанне стварыць працоўную групу даў начальнік упраўлення па звароце грамадзян і юрыдычных асоб Станіслаў Бука.
Тамара Сяргей: “Ён сказаў, што прынята рашэнне кіраўніком адміністрацыі аб стварэнні працоўнай групы, якая будзе вывучаць праблему адпісак. Мы папрасілі, каб у гэтую групу апроч прадстаўнікоў суда і пракуратуры ўключылі выкладчыкаў юрыдычнага факультэта”.
Усяго, па словах праваабаронцы, кіраўнік адміністрацыі прыняў трох чалавек. А чакаць адказу ў Адміністрацыі прэзідэнта праваабаронцы давялося увесь дзень: з паловы дзясятай раніцы да 16:00.
Фота: belcity.by
