У беларуса канфіскавалі машыну ў апошні дзень працы літоўскага пункта пропуску
Літоўцы спынілі кантрабанду / МУС Літвы
Выпадак кантрабанды цыгарэт быў выяўлены ў пункце пропуску "Райгардас" у апошні дзень яго працы 29 лютага.
Магчыма, кантрабандыст спадзяваўся, што мытнікі будуць не так старанна даглядаць аўтамабілі перад закрыццём пункта пропуску.
29 лютага каля 20:00 на аўтамабілі Honda Accord прыехаў грамадзянін Беларусі. Ён сцвярджаў, што вязе з сабой толькі два пачкі цыгарэт і бутэльку алкаголю.
Але мытнікі западозрылі, што ў машыне можа быць больш цыгарэт. Пасля дэталёвага агляду Honda у парогах аўтамабіля было знойдзена яшчэ 540 пачкаў розных беларускіх цыгарэт на суму €2235.
На парушальніка склалі пратакол аб адміністрацыйным правапарушэнні, канфіскаваны нелегальныя цыгарэты і аўтамабіль коштам €1300. Пра гэта паведамляе літоўская мытня.
