У Беларусі да канца года спадзяюцца наладзіць вытворчасць упакоўкі для прадуктаў

У Беларусі да канца года спадзяюцца наладзіць вытворчасць упакоўкі для прадуктаў харчавання. Такую задачу ў пятніцу паставіў Аляксандр Лукашэнка падчас наведвання Мінскага малочнага завода №1.

"Каб гэты ўпаковачны матэрыял быў выраблены ў Беларусі. Каб да канца года матэрыял быў, — запатрабаваў ён. — Хімічная прамысловасць у нас суперразвітая, а мы не можам цырату гэтую вырабіць".

Адказным за рэалізацыю праекта Лукашэнка прызначыў міністра сельскай гаспадаркі і харчавання Ігара Брыло. "Кантралёрам" будзе віцэ-прэм'ер Леанід Заяц.

Нядаўна праблема ўпаковачнага матэрыялу для некаторых відаў прадукцыі харчавання (найперш малака) абмяркоўвалася ў Саўміне з удзелам Аляксандра Лукашэнкі. Яго прадпрыемствы закуплялі за мяжой. Падчас санкцый з гэтым узніклі праблемы. Брыло заявіў, што наладжваюцца пастаўкі з КНР, але іх аб'ёмы пакуль нязначныя.