У Газу па моры даставілі 200 тон прадуктаў. Людзі ў сектары паміраюць ад голаду
Дапамога для людзей, што галадаюць у сектары Газа / chefjoseandres
Гуманітарную дапамогу для Газы ўпершыню ўдалося даставіць па вадзе. Першае судна выгрузіла 200 тон харчавання на бераг, піша ВВС.
Іспанскае судна Open Arms адплыло ад Кіпра ў аўторак. На борце былі рыс, мука, бабовая, кансерваваная гародніна і бялкі.
Прадукты перадала кампанія World Central Kitchen. Яе заснавальнік, вядомы шэф-кухар Хасэ Андрэс, напісаў у X, што ўсе 200 тон харчавання была перагружаныя ў 12 грузавікоў.
We did it! Teams of @WCKitchen and @openarms_fund working hard to offload all 200 tons…12 trucks! This was a test! To learn…we could bring thousands of tons a week..with what we learn we will get better…working with the local communities of Palestinians “Operation Safeena” is… pic.twitter.com/tX5FdGlhGB
— José Andrés 🇺🇸🇪🇸🇺🇦 (@chefjoseandres) March 15, 2024
Па словах Андрэса, пасля таго, як марскі шлях паставак прайшоў праверку, у Газу можна будзе дастаўляць да тысячы тон прадуктаў за тыдзень. Пакуль незразумела, як яны будуць размяркоўвацца ўнутры сектара.
Гуманітарныя арганізацыі выпрабавалі марскі шлях пастаўкі пасля таго, як спробы скідаць дапамогу з паветра прывялі да трагедыі. Пяць чалавек загінулі з-за няспраўнага парашута. Груз з гуманітарнай дапамогай упаў проста на людзей.
Наземныя ж пастаўкі прыйшлося часова прыпыніць пасля таго, як канвоі падвергліся абстрэлу і рабаванням.
Уласная вытворчасць прадуктаў харчавання ў Газе сур'ёзна пацярпела з-за ваенных дзеянняў. Фермы, пякарні і фабрыкі былі разбураны або заблакаваны.
Кіраўнік знешнепалітычнага ведамства ЕС Жазэп Барэль абвінаваціў Ізраіль у стварэнні тэхнагеннай катастрофы і выкарыстанні голаду ў якасці зброі на вайне. Ізраіль катэгарычна адмаўляе сваю віну за недахоп харчавання ў сектары Газа. Тэль-Авіў дазваляе пастаўкі дапамогі праз два кантрольна-прапускныя пункта на поўдні і лічыць, што праблема ў няздольнасці гуманітарных арганізацый справіцца з лагістыкай.
