У Гомелі судзяць хулігана, які ў тралейбусе парэзаў нажом трох міліцыянераў

Здарэнне адбылося ў цэнтры Гомеля ўвечары 15 траўня. Праваахоўнікі высачылі маладога чалавека, які збег з папраўчай установы адкрытага тыпу, дзе адбываў пакаранне за хуліганства і незаконны абарот наркотыкаў (ён збіў на вуліцы мінака, а падчас затрымання ў яго знайшлі марыхуану). Аператыўнікі вырашылі затрымаць 24-гадовага ўцекача ў салоне тралейбуса, але ён выхапіў нож і пачаў наносіць удары. Трое міліцыянераў атрымалі сур'ёзныя раненні. Зламыснік з тралейбуса ўцёк.

У горадзе быў абвешчаны план "Перахоп". Мужчыну знайшлі ў раёне цэнтральнага парку. Але ён кінуўся да ракі Сож і пераплыў яе. На іншым беразе яго злавілі АМАПаўцы. Праўда, ім давялося страляць. З параненымі нагамі затрыманага завезлі ў бальніцу.