У Грузіі набыў сілу закон аб замежных агентах

Спікер парламента Грузіі Шалва Папуашвілі падпісаў закон аб замежных агентах. Зацвердзіць гэты дакумент мусіла прэзідэнтка краіны Саламэ Зурабішвілі, але яна адмовілася гэта рабіць.

Супраць прыняцця гэтага дакумента ў Грузіі збіраліся мітынгі. Праціўнікі прыняцця дакумента казалі, што кіруючая партыя ідзе па шляху Расіі з яе рэпрэсіўным законам аб замежных агентах, і гэта пагражае не толькі грамадзянскаму сектару і незалежным СМІ, але і еўрапейскай будучыні Грузіі. Нагадаем, у снежні мінулага года краіна атрымала статус кандыдата ў ЕС. Прэзідэнт Зурабішвілі спачатку наклала вета на закон (але парламент яго пераадолеў), затым адмовілася падпісваць, прапанаваўшы правесці рэферэндум. У выніку дакумент падпісаў спікер парламента.

"Сёння я падпісаў закон "Аб празрыстасці замежнага ўплыву". Мэтай гэтага закона з'яўляецца ўмацаванне палітычнай, эканамічнай і сацыяльнай сістэм Грузіі адносна ўмяшання звонку",— заявіў на брыфінгу Папуашвілі. З яго подпісам дакумент уступіў у сілу.

Новы закон прадугледжвае, што няўрадавыя арганізацыі і СМІ, якія атрымліваюць больш за 20% фінансавання з-за мяжы, павінны рэгістравацца ў якасці арганізацый, "якія праводзяць інтарэсы замежнай сілы". 160 грузінскіх НДА і СМІ ўжо заявілі, што не маюць намеру рэгістравацца ў рэестры замежных агентаў.