У Кіеве чакаюць, што сёння вызваляць асуджанага за шпіянаж у Беларусі Шаройку

У Кіеве чакаюць, што сёння вызваляць асуджанага за шпіянаж у Беларусі ўкраінскага журналіста Паўла Шаройку. Гэтую падзею напярэдадні ў эфіры тэлеканала "1+1" анансаваў міністр замежных спраў Украіны Вадзім Прыстайка. Паводле яго слоў, у пятніцу "будзе тое, пра што сродкі масавай інфармацыі з радасцю змогуць паведаміць".

Павел Шаройка быў затрыманы ў Мінску ў кастрычніку 2017 года. КДБ Беларусі абвінаваціў яго ў шпіянажы і стварэнні агентурнай сеткі з беларускіх грамадзян. Украінца асудзілі на 8 гадоў пазбаўлення волі.

Напярэдадні ў Чарнігаве выйшаў з-за кратаў беларускі "шпіён" Юрый Палітыка, паведамляе Радыё Свабода. Суд вызваліў абвінавачанага ў зборы сакрэтнай інфармацыі "пад асабістыя абавязацельствы". Працэс па яго справе будзе працягвацца, але пры гэтым няма абмежавання на выезд беларускага грамадзяніна з Украіны.

Палітыка быў затрыманы Службай бяспекі Украіны ў чэрвені 2017 года. У яго тэлефоне знайшлі файл з сакрэтнай інфармацыяй. Беларус абвяргае абвінавачанні ў шпіянажы. Разгляд яго справы пачаўся ў красавіку сёлета.

На нядаўняй сустрэчы з украінскімі журналістамі Аляксандр Лукашэнка сказаў, што гатовы ўжо ў бліжэйшы час "на ўзаемнай аснове" абмяняць Шаройку і Палітыку. Ён прызнаўся, што гэта мусіла адбыцца яшчэ ў часы прэзідэнцтва Пятра Парашэнкі, але ўкраінскі бок не выканаў абяцанні. Абмен можа быць прымеркаваны да сённяшняга візіту Лукашэнкі ва Украіну.