У лесе пад Мінскам АМАП затрымаў 16 чалавек. Зноў анархісты?

Позна ўвечары 16 лютага АМАП затрымаў у лесе ў пасёлку Сухарукія пад Мінскам кампанію моладзі, якая адзначала Дзень нараджэння. Маладых людзей даставілі ў РАУС і адпусцілі толькі пад раніцу. На іх склалі пратаколы за распіццё алкаголю ў грамадскім месцы.

Самі затрыманыя звязваюць міліцэйскі рэйд з тым, што некаторыя з кампаніі бяруць удзел у анархісцкай руху.

Адной з затрыманых у той вечар была Вераніка (прозвішча ёсць у рэдакцыі). Маладыя людзі сапраўды ўжывалі алкаголь. "Як і на любом свяце", — кажа дзяўчына. Праз гадзіну пасля пачатку ўрачыстасці хлопцы ўбачылі супрацоўнікаў АМАП.

"Літаральна праз хвіліну мы апынуліся ўсе тварам у снезе, на нас была нацэленая зброя. Хлопцам надзелі кайданкі, аднаму іх надзелі крыжам. Дзяўчаты ляжалі ў снезе, на просьбу дазволіць ўстаць хоць б на кукішкі было адмоўлена, але праз нейкі час усё-такі дазволілі", — распавяла Еўрарадыё дзяўчына.

"Супрацоўнікі ГУБАЗ проста так не прыязджаюць"

Па словах Веранікі, супрацоўнікі АМАП абмацюкалі затрыманых, а міліцыянты ў цывільным адзенні здымалі маладых людзей на камеру. Ніякіх дакументаў ім не прад'явілі. Дзяўчына кажа, што відэазапіс вялі супрацоўнікі ГУБАЗіК.

“Усіх затрыманых у машынах без апазнавальных знакаў павезлі ў Бараўлянскі РАУС, — працягвае Вераніка. — На пытанне, чаму нас затрымалі, былі такія адказы: "Звязаліся з дрэннай кампаніяй", "Распівалі алкаголь у неналежным месцы", "Супрацоўнікі ГУБАЗ проста так не прыязджаюць"”.

На некаторых з маладых людзей склалі адміністрацыйныя пратаколы па артыкуле 17.3 і 17.4 КоАП ( "Распіццё алкагольных, слабаалкагольных напояў ці піва ў грамадскім месцы" і "Уцягванне непаўналетняга ў антыграмадскія паводзіны").

Адзін са складзеных пратаколаў ёсць у распараджэнні Еўрарадыё. З яго вынікае, што затрыманне адбылося каля 23:00 16 лютага. Сам пратакол складзены ўжо пасля поўначы, 17 лютага. Мяркуючы па яго тэксце, маладыя людзі правялі ў РАУС каля дзвюх гадзін.

Анархістаў, кажа Вераніка, не пад пратакол дапытваў супрацоўнік ГУБАЗіК Мікалай. Яны не пілі алкаголь, таму выйшлі з РАУС без адміністрацыйных пратаколаў.

"Супрацоўнікі ГУБАЗіК ўжо не першы год праследуюць нефармальную моладзь, футбольных фанатаў і гэтак далей. Незалежна ад таго, прытрымліваюцца гэтыя людзі якіх-небудзь палітычных поглядаў ці не. У нашым выпадку ў кампаніі было некалькі чалавек, якія займаюць актыўную сацыяльную пазіцыю і займаюцца дабрачыннасцю, але ні да якіх палітычных рухаў сябе не адносяць. Свята планавалася загадзя, мы размаўлялі па мабільным тэлефоне. Мабыць, нашы тэлефоны праслухоўваліся, і ўжо ў дзень свята па GPS нас вылічылі ў лесе".

Павесткі ў суд маладыя людзі яшчэ не атрымалі. У РАУС яны правялі розны час. Некаторых адпусцілі раней, але анархісты правялі ў аддзяленні міліцыі ўсю ноч — яны выйшлі адтуль каля чатырох гадзін раніцы. Двух хлопцаў з кампаніі адправілі ў ІЧУ, а пасля прызначылі штраф у дзве базавыя (51 рубель).