У "пашпарце турыста" бязвізавай зоны не будзе беларускай мовы
Замежным турыстам, якія прыбудуць у бязвізавую зону Гродна, плануецца выдаваць адмысловыя пашпарты. Як паведаміла гродзенскае ўпраўленне спорту і турызму, дакументы будуць на трох мовах — рускай, польскай і англійскай.
Адсутнасцю беларускай мовы ў дакуменце абурыўся гродзенскі праваабаронца Уладзімір Хільмановіч, перадае Радыё "Свабода". Гродзенец звярнуўся з лістом да кіраўніка ўпраўлення Алега Андрэйчыка і заклікаў неадкладна выправіць гэтую памылку. На яго думку, мову тытульнай нацыі дзяржавы абавязкова мусіць быць у сімвалічных пашпартах.
Ужо вядома, што "пашпарт турыста" будзе выглядаць як друкаваны буклет з інфармацыяй аб рэгіёне. У ім будуць пададзеныя адрасы гатэляў, кавярняў, музеяў, аграсядзібаў, карысныя інтэрнэт-сайты. Уладальнік такога пашпарту ў пазначаных месцах зможа атрымаць зніжкі. Выдаваць пашпарты турыстам плануецца са снежня.
