У Расіі могуць заблакаваць папулярныя сацыяльныя сеткі Facebook і Twitter
Пра гэта паведамляе сайт расійскага незалежнага тэлеканала "Дождь" са спасылкай на прэс-сакратара "Раскамнагляда" Вадзіма Ампелонскага.
Ён пацвердзіў, што заява намесніка кіраўніка ведамства Максіма Ксянзова пра магчымасць поўнай блакіроўкі Facebook і Twitter — гэта афіцыйная пазіцыя. "Раскамнагляд" цяпер разглядае гэтую магчымасць.
Раней Ксянзоў заявіў у СМІ, што кіраўніцтва некаторых замежных інтэрнэт-кампаній не ідзе на кантакт з расійскімі ўладамі і "выкарыстоўвае карыстальнікаў як інструмент палітыкі" (Масква хоча, каб буйныя сацыяльныя сеткі мелі свае серверы на расійскай тэрыторыі). Паводле чыноўніка, "Раскамнагляд" успрымае гэта як "сацыяльную пагрозу" і гатовы заблакаваць Facebook і Twitter у Расіі.
Фота — AFP
