У расійскім палоне памерла ўкраінская журналістка
Вікторыя Рошчына / facebook.com
У расійскім палоне памерла ўкраінская журналістка Вікторыя Рошчына. Здарылася гэта падчас этапавання з Таганрога ў Маскву. Бацькі Рошчынай атрымалі афіцыйнае паведамленне, піша hromadske.ua.
Пазней пра смерць журналісткі паведаміў прадстаўнік Каардынацыйнага штаба па абыходжанні з ваеннапалоннымі Пётр Яцэнка. Паводле яго слоў, яе рыхтавалі да абмену.
Днямі Вікторыі Рошчынай споўнілася 28 гадоў. Яна знікла 3 жніўня 2023-га на часова акупаванай расіянамі тэрыторыі Украіны. Доўгі час не было ніякай інфармацыі пра лёс журналісткі. І толькі вясной сёлета Расія пацвердзіла, што Рошчына затрыманая і знаходзіцца на тэрыторыі РФ.
Вікторыю Рошчыну называюць таленавітай журналісткай. Як фрылансерка, яна супрацоўнічала з "Украінскай праўдай", hromadske, "Украінскім радыё", "UA:Першы", "Цэнзар.нет", украінскай рэдакцыяй Радыё Свабода. У 2022-м яна атрымала ўзнагароду Міжнароднага жаночага медыйнага фонду "За мужнасць у журналістыцы".
