У Сірыі паўстанцы занялі горад Хама

У Сірыі паўстанцы занялі горад Хама. Элітныя падраздзяленні Башара Асада не змаглі яго ўтрымаць і адступілі. Яны заявілі пра "перадыслакацыю", каб "захаваць жыцці мірных жыхароў і прадухіліць гарадскія баі". Таксама Мінабароны Сірыі прызнала вялікія страты.

Як паведамляе Reuters, паўстанцы праводзяць "зачыстку" горада, бяруць яго пад кантроль, вызваляюць палітвязняў.

Хама — пяты па велічыні горад Сірыі. Паўстанцы невялікімі сіламі ўвайшлі ў яго неўзабаве пасля ўзяцця Алепа. Але адступілі, калі рэжым Башара Асада прыслаў баяздольныя падраздзяленні з танкамі. Пасля накаплення сіл і бронетэхнікі паўстанцы зноў паспрабавалі захапіць горад. Баі на падыходах працягваліся тры дні. Паўстанцы пачалі акружаць горад, актыўна выкарыстоўвалі дроны-камікадзэ, і войскі Башара Асада адступілі. Ім не дапамагла і расійская авіяцыя, якая наносіць удары па калонах паўстанцаў.

Грамадзянская вайна ў Сірыі працягваецца з 2011 года. Рэжым Асада падтрымліваюць Расія і Іран, апазіцыйныя групоўкі, якія кантралююць правінцыю Ідліб (а цяпер і Алепа) падтрымлівае Турцыя. Менавіта з Ідліба і пачаўся 27 лістапада наступ, які застаў войскі Башара Асада знянацку. Ужо праз тры дні Алепа быў заняты.