У Вялікабрытаніі забароняць прадаваць цыгарэты ўсім, хто нарадзіўся пасля 2008 года

Брытанскі парламент ухваліў закон аб "пакаленні без тытуню". Ён забароніць продаж тытунёвых вырабаў усім, хто нарадзіўся пасля 31 снежня 2008 года.

Фармальна курэнне не забараняюць. Але купіць цыгарэты, цыгары і іншыя тытунёвыя вырабы людзі 2009 года нараджэння і маладзейшыя ўжо не змогуць — нават калі стануць дарослымі. Закон яшчэ чакае каралеўскага ўхвалення, пасля чаго ўступіць у сілу.

Міністр аховы здароўя Уэс Стрытынг назваў гэтае рашэнне "гістарычным момантам для здароўя нацыі". Паводле яго слоў, дзеці ў Вялікабрытаніі стануць "першым пакаленнем без курэння".

Закон таксама ўзмацняе правілы для электронных цыгарэт. Улады атрымаюць больш паўнамоцтваў для рэгулявання смакаў, упакоўкі і выкладкі вэйпаў. Абмежаванні на курэнне і вэйпінг закрануць дзіцячыя пляцоўкі, тэрыторыі школ, бальніцы і аўтамабілі, дзе знаходзяцца дзеці.

Брытанцы ідуць шляхам Мальдываў. З 1 лістапада 2025 года там дзейнічае падобная забарона: тытунь нельга прадаваць і купляць людзям, якія нарадзіліся 1 студзеня 2007 года або пазней. Мальдывы сталі першай краінай, якая ўвяла такую "пакаленчую" забарону на тытунь.