Украіна правядзе допыт Януковіча ў фармаце відэаканферэнцыі
25 лістапада Украіна правядзе допыт былога прэзідэнта Украіны Віктара Януковіча ў рэжыме відэаканферэнцыі. Яго дапытаюць па справе пяцярых байцоў спецыяльнага палка спецпрызначэння МУС "Беркут".
Пра гэта паведамляе УНІАН са спасылкай на Віталя Сердзюка, адваката Януковіча. Па яго словах, расійскі бок даў згоду на такі допыт. Цяпер справа толькі за Святошынскім судом Кіева, які павінен арганізаваць тэхнічную магчымасць.
Януковіча плануюць дапытаць па справе пяцярых былых байцоў спецпадраздзялення МУС "Беркут" Паўла Аброськіна, Сяргея Зінчанкі, Аляксандра Марынчанкі, Сяргея Тамтуры і Алега Янішэўскага. Іх падазраюць у масавых забойствах актывістаў Майдана.
