Украінцы затрымалі на мяжы з Беларуссю расіяніна з пісталетам "ТТ"
Здарэнне адбылося 14 сакавіка на Жытоміршчыне, у пункце пропуску "Выступовічы" (на беларускім баку — "Новая Рудня", гэта Гомельская вобласць).
Як паведамляе УНІАН, мужчыну з пісталетам спынілі супрацоўнікі Дзяржпамежслужбы Украіны сумесна з мытнікамі. На аўтамабіль "УАЗ", на якім ён ехаў, "спрацаваў" службовы сабака. Падчас агляду салона машыны знайшлі пісталет "ТТ" і патроны. Праваахоўнікі высвятляюць, з якой мэтай расіянін вёз зброю.
На жаль, адкуль ехаў затрыманы (у Беларусь ці з Беларусі), не паведамляецца.
Нагадаем, сёння ў паўночным Крыме ўкраінскія вайскоўцы затрымалі ўзброенага чачэнца-расійскага вайскоўца. Высветлілася, што ён з'яўляецца супрацоўнікам ваеннай разведкі.
