Улады хваляцца вакансіямі ў Мінску — але хто пойдзе працаваць за такія грошы?

Мяркуючы па звестках дзяржаўнай службы занятасці, у сталіцы зарэгістравана 16,4 тысячы вакансій. З іх 4,6 тысячы, гэта значыць больш чым кожная чацвёртая, абяцаюць заробак усяго да 500 рублёў.

Заробак вышэй 2,5 тысячы рублёў (каля $1000) прапануецца толькі па 162 вакансіях.

Максімальны заробак сёння ў Мінску прапануюць пілоту самалёта (амаль 15 тысяч рублёў), намесніку дырэктара ў букмекерскую кантору (13,3 тысячы рублёў) і кіраўніку ў IT-кампанію (каля 11 тысяч рублёў).

Мінімальныя заробкі — на няпоўную стаўку. Напрыклад, на 75 рублёў у месяц (!) — на 0,15 стаўкі ў гімназію шукаюць педагога з дасканалым валоданнем нямецкай мовай. Адна з арганізацый шукае на 0,2 стаўкі касіра, абяцаюць тыя ж 75 рублёў. А ў адным з банкаў на паўстаўкі для кіроўцы вылучаюць толькі 90 рублёў.

Больш за ўсё Мінску не хапае слесараў: для іх адкрыта 1148 вакансій. Сярод найбольш дэфіцытных спецыялістаў таксама рабочыя (819), медсёстры (699) і прыбіральшчыкі (694). Словам, вакансій — хоць адбаўляй, чаго вам яшчэ не падабаецца?