Урны, сцягі і эстрада: колькі чыноўнікі марнуюць на "выбары"-2025

1445 рублёў стаіць падрыхтоўка да "выбараў" Гродзенскага абласнога клінічнага перынатальнага цэнтра — адна урна, адна скрыня, інфармацыйная шыльда і банер.

Гродзенскі дзяржаўны электратэхнічны каледж імя Івана Шчаснага на "выбары" грошай не шкадуе і вылучае цэлыя 5983 рублі на набыццё дзвюх кабінак і трох урнаў.

Вялікую партыю атрыбутаў для "выбараў" закупілі і гродзенскія чыноўнікі — на 18 637 рублёў. У спісе — празрыстыя урны для галасавання і вялікія кабіны.

Культурная праграма, банеры, сцяжкі

Каб запрасіць на ўчасткі выступіць заслужанага артыста Беларусі Дзмітрыя Сяргеева, спявачку Ганну Міхалёнак і Ірыну Зыль, чыноўнікі з Цэнтральнага раёна Мінска вылучылі 6800 рублёў. Менавіта так яны бачаць "арганізацыю культурнай праграмы ў гонар "выбараў".

А Рэспубліканскі інстытут вышэйшай школы выдаткаваў 7794 рублёў — акрамя урнаў і кабінак для галасавання яны набылі дзяржаўны сцяг на флагштоку за 710 рублёў і герб за 150.

У вёсцы Новая Мыш пад Баранавічамі таксама рыхтуюцца да "выбараў" з размахам: адных толькі налепак і банераў закупілі на 3822 рублі.

Гродзенскі аддзел Следчага камітэта, мабыць, вырашыў прымусіць сваіх супрацоўнікаў падвучыць законы да "выбараў" і замовіў цэлых 27 асобнікаў Выбарчага кодэкса Беларусі на 300 рублёў.

Будзем спадзявацца, што яны яго пачытаюць і гэта пойдзе ім на карысць.