Успышку каранавіруса зарэгістравалі ў яшчэ адным дзіцячым летніку

Успышка каранавіруса зарэгістраваная ў дзіцячым аздараўленчым летніку "Про100р" у Лёзненскім раёне Віцебшчыны. Там захварэлі 13 дзяцей, піша smartpress.by.

Дзяцей, у якія выявілі COVID-19, ізалявалі ў асобны корпус.

"Усе пачуваюцца нармальна. На шчасце, дзеці лёгка пераносяць гэты вірус, а ўсе педагогі ў нас прышчэпленыя. Для дзяцей арганізавана асобнае харчаванне, асобная праграма", — кажа сузаснавальнік Цэнтра "100 балаў" Дзмітрый Рыжыкаў.

Па яго словах, першы выпадак быў дыягнаставаны 19 жніўня. Хутчэй за ўсё, ён быў завозны.

21 жніўня ў летнік прыязджала камісія санэпідстанцыі. 

Рыжыкаў дадаў, што бацькі могуць забраць дзяцей, але такой магчымасцю скарысталіся нямногія. 

Як распавядала Еўрарадыё, 10 дзён таму ўспышку каранавіруса зарэгістравалі ў дзіцячым летніку ў Смаргонскім раёне.