Ва Украіне загінула 24-гадовая беларуская добраахвотніца Марыя Зайцава
Марыя Зайцава / RFE/RL
24-гадовая беларуская добраахвотніца Марыя Зайцава загінула ва Украіне. Пра гэта піша "Наша Ніва" са спасылкай на сяброў дзяўчыны.
У Беларусі яна вядомая па фатаграфіі, зробленай 9 жніўня 2020 года ў Мінску каля Стэлы. Тады дзяўчыну паранілі святлошумавой гранатай. Марыі зрабілі некалькі аперацый на радзіме, а потым вывезлі на лячэнне ў Чэхію.
Пасля пачатку вайны дзяўчына далучылася да абаронцаў Украіны. Зайцава загінула ў баях пад Бахмутам, дзе ваявала ў складзе 2-га Інтэрнацыянальнага легіёна.
Марыя — гамяльчанка. У Мінск яна прыехала ў жніўні 2020 года разам з сябрам спецыяльна для ўдзелу ў пратэстах супраць фальсіфікацыі прэзідэнцкіх выбараў. "Нас закідалі святлошумавымі гранатамі, я адразу згубіла прытомнасць, мяне параніла ў галаву, я была кантужаная", — расказвала дзяўчына.
Яе з дарогі адцягнулі сябры, якія таксама былі параненыя асколкамі гранат. "Нейкім чынам у мяне яшчэ ў сцягне апынуліся тры гумовыя кулі. Напэўна, гэта адбылося ўжо тады, калі я згубіла прытомнасць. Хіба што я выглядала вельмі небяспечнай на зямлі. Прачнулася я ў рэанімацыі", — згадвала Марыя ў адным з інтэрв'ю.
