Вучоныя прачыталі думкі нямога, а амерыканка скончыла школу ў 99 гадоў #ІхНоравы

22/05/2024 - 15:56

Міжнародныя навіны / @rubanau_collage

Калі вы раптам планавалі купіць сабе замак у сярэднявечным стылі — мы адшукалі для вас цудоўны варыянт усяго за 2 мільёны еўра. Падрабязнасці ў нашай штодзённай падборцы міжнародных навін.

Амерыканка скончыла школу ў 99 гадоў. Такое бывае?

У свой час Элеаноры Монінгер не хапіла толькі аднаго класа, каб скончыць школу — вучобу перапыніла Другая сусветная вайна. Брат пайшоў на фронт, а бацьку патрабавалася дапамога ў гаспадарцы.

Да таго часу, як яна вызвалілася ад кармлення куранят і даення кароў, яе аднагодкі ўжо скончылі школу, а вучыцца з падлеткамі, якія былі яшчэ маладзейшымі, яна не хацела.

Пазней Монінгер выйшла замуж, у яе з'явіліся дзеці. Але думкі, што яна так і не скончыла школу, працягвалі яе пераследаваць. У мінулую суботу 99-гадовая жанчына ўсё ж такі атрымала атэстат у прысутнасці амаль 3000 чалавек — усе яны былі маладзейшыя за Элеанору больш чым на 80 гадоў.

Знаходзячыся на сцэне, Монінгер намякнула, што атрыманне дыплома аб сярэдняй адукацыі не стане канцом яе акадэмічнай кар'еры.

"Мне толькі 99 гадоў. Я магу пайсці далей і адвучыцца некалькі курсаў у каледжы", — прызналася жанчына. Вось гэта імпэт да жыцця!

Сцеражыся… электрамабіля

Нядаўні аналіз дарожна-транспартных здарэнняў у Вялікабрытаніі паказаў, што электрамабілі збіваюць пешаходаў часцей, чым бензінавыя або дызельныя транспартныя сродкі. Асабліва ў гарадах, піша The Guardian.

Па-першае, кіроўцы электрамабіляў, як правіла, маладзейшыя і менш дасведчаныя. Па-другое, экалагічныя машыны — нашмат цішэйшыя, чым аўтамабілі з рухавікамі ўнутранага згарання, што робіць іх менш заўважнымі ў гарадскім шуме.

"Калі вы перасаджваецеся на электрамабіль, памятайце, што гэта новы від транспарту, яны нашмат цішэйшыя за звычайныя аўтамабілі, а пешаходы навучыліся арыентавацца на дарогах, прыслухоўваючыся да руху транспарту", — папярэджвае аўтар даследавання Філ Эдвардс.

Дарожна-транспартныя здарэнні з'яўляюцца асноўнай прычынай смяротнасці сярод дзяцей і моладзі ў Вялікабрытаніі. На долю пешаходаў прыпадае чвэрць усіх смерцяў на дарогах.

Вучоныя навучыліся расшыфроўваць думкі нямых людзей. Ого!

Упершыню ў гісторыі мазгавы імплант дапамог двухмоўнаму нямому чалавеку камунікаваць словамі. Сістэма штучнага інтэлекту, злучаная з імплантам, у рэжыме рэальнага часу расшыфроўвае тое, што чалавек спрабуе сказаць на іспанскай і англійскай мове.

"Гэтае новае даследаванне з'яўляецца важным унёскам у развіццё вобласці нейрапратэзаў для аднаўлення маўленчай здольнасці", — кажа Сяргей Ставіскі, нейрабіёлаг з Каліфарнійскага універсітэта ў Дэвісе.

Першым, хто выпрабаваў распрацоўку, стаў мужчына па мянушцы Панча. У 20 гадоў у яго здарыўся інсульт, ад чаго большую частку яго цела спаралізавала.

У кару галаўнога мозгу Панча імплантавалі электроды для запісу нейронавай актыўнасці. Эксперымент скончыўся паспяхова — неўзабаве словы, якія спрабаваў сказаць мужчына, былі выведзеныя на экран.

Кэндзі Кансаку, нейрафізіёлаг з медыцынскага ўніверсітэта Докё (Японія), заявіў, што акрамя дадавання новых удзельнікаў, у праграму будуць укараняцца і новыя мовы: "У ідэале мы хацелі б даць людзям магчымасць камунікаваць як мага больш натуральна".

У Германіі прадаюць міні-замак амаль за 2 мільёны еўра

У 1887 годзе паштовы работнік Альберт Хенеберг атрымаў спадчыну і здзейсніў мару сваёй жонкі Марыі — пабудаваў копію сярэднявечнага замка ў Гамбургу, зменшаную ў чатыры разы.

Плошча пабудовы — усяго 46 кв. м, у ёй толькі два пакоі. Жыць у ёй забаронена, таму што па дакументах гэта садовы дамок, але яго часта выкарыстоўваюць для правядзення вяселляў. За апошнія 10 гадоў там пабывала амаль 60 тысяч наведвальнікаў.

Апошні ўладальнік замка памёр у 1986 годзе. З тых часоў ён ахоўваецца як помнік архітэктуры. Каштуе міні-замак 1,9 млн. еўра або 41300 еўра за квадратны метр.