Турма па коле. Як сілавікі заводзяць новыя і новыя справы супраць палітвязняў

21/05/2024 - 22:29

Рэпрэсіі без канца і межаў / @rubanau_collage

Палітзняволеная Паліна Шарэнда-Панасюк цалкам адбыла тэрмін — але так і не выйшла з турмы 21 траўня. Жанчыну этапавалі ў гомельскае СІЗА, дзе ёй сёння выставілі ўжо трэці раз абвінавачванне — непадпарадкаванне адміністрацыі калоніі, праз што працягнулі турэмны тэрмін.

Рэжым не аднойчы праварочвае такі “трук”, прысуджаючы нелаяльным уладзе беларусам усё новыя і новыя пакаранні па пазбаўленню волі. Сёння, у Дзень салідарнасці з палітвязнямі, Еўрарадыё ўзгадвае такія выпадкі.

Зміцер Дашкевіч

Актывіста “Маладога фронту”, якога добра ведаюць як актыўнага абаронцу ўрочышча Курапаты, асудзілі летам 2022 года за ўдзел у акцыі пратэсту 23 жніўня 2020 года на паўтара года калоніі. А яго жонку Насту па той жа справе — да трох год "хатняй хіміі".

У сярэдзіне мінулага лета Дашкевіч мусіў выйсці на свабоду, але гэтага не адбылося. На актывіста у ліпені 2023 года завялі новую крымінальную справу за "злоснае непадпарадкаванне патрабаванням адміністрацыі папраўчай установы”, суд Барысаўскага раёна прысудзіў яму яшчэ адзін год калоніі ўзмоцненага рэжыму.

Цяпер Зміцер знаходзіцца ў папраўчай калоніі №14 у Барысаўскім раёне.

Васіль Дземідовіч

71-гадовага пенсіянера з Нясвіжа Васіля Дземідовіча з лета 2022 года паспелі асудзіць восем раз запар, апошні раз — у Крупках 20 траўня. Так сілавікі помсцяць мужчыне за каментары ў тэлеграм-канале “Карнікі Беларусі”.

Агулам мужчыну прысудзілі 7 гадоў пазбаўлення волі ў калоніі ва ўмовах узмоцненага рэжыму і грашовы штраф у дзесяць тысяч долараў. Пры гэтым вынік апошніх двух судоў пакуль невядомы, то-бок тэрмін пакарання можа быць яшчэ большым.

Да таго ж палітвязня ўнеслі ў "спіс тэрарыстаў", праз што яму нельга рабіць грашовыя пераводы. Месца ўтрымання Васіля пакуль невядомае.

Кацярына Бахвалава (Андрэева)

Калі вы ў 2020 годзе глядзелі стрымы тэлеканала “Белсат” з нядзельных маршаў, то павінны дакладна ведаць журналістку Кацярыну Андрэеву. Менавіта падчас стрыма ля Плошчы Перамен 15 лістапада 2020 года яе і аператарку Дар’ю Чульцову затрымалі сілавікі.

Журналістак асудзілі за “арганізацыю і падрыхтоўку дзеянняў, што груба парушаюць грамадскі парадак” і прысудзілі да двух гадоў калоніі ўзмоцненага рэжыму.

Дар’я цалкам адбыла тэрмін і выйшла, а на Кацярыну вясной 2022 года павесілі новае абвінавачванне “за здраду дзяржаве” — і асудзілі на 8 гадоў і 3 месяцы. Журналісты мяркуюць, што гэта можа быць звязанае з экс-агентам КДБ, які прызнаўся ў супрацы са спецслужбамі. Размову з ім Бахвалава якраз і запісвала.

Уладзімір Запольскіх

Студэнт юрфака БДУ Уладзімір Запольскіх — ахвяра “справы Зэльцара”, падчас якой быў застрэлены кдбіст Дзмітры Федасюк. Хлопцу інкрымінавалі адразу некалькі крымінальных артыкулаў, ад абразы прадстаўнікоў улады да арганізацыі беспарадкаў, і восенню 2022 года суд пакараў яго 2 гадамі калоніі.

У студзені 2023 года мужчына выйшаў на волю, але ўжо вясной яго затрымалі зноў і далі за каментары яшчэ год калоніі.

Адбывае пакаранне Уладзімір у папраўчай калоніі №11 у Ваўкавыску.

Сяргей Раманаў

Хлопец праходзіў па справе анархістаў, яго затрымалі восенню 2020 года. Абвінавачванне грунатавалася на справах, звязаных з падпалам службовых аўтамабіляў, будынка ДАІ і дзяржаўнага камітэта экспертыз у Гомельскай вобласці. Агулам Мінскі абласны суд пакараў Раманава 20 гадамі калоніі строгага рэжыму.

Вясной 2023 года беларуса зноў судзілі — і дадалі да тэрміна 11 месяцаў за непадпарадкаванне адміністрацыі Ваўкавыскай калоніі, дзе сядзеў “анархіст”.

Сёння Сяргей Раманаў знаходзіцца ў горацкай калоніі №9.

Арцём Анішчук

Не з першай спробы выйшаў на волю і Арцём Анішчук, які праходзіў па справе аб пашкоджанні аўтамабіля аднаго з супрацоўнікаў Дэпартамента выканання пакаранняў. У лютым 2021 года яго засудзілі на два гады калоніі.

Яго этапавалі ў Магілёўскую калонію № 15, дзе мужчыну катавалі і збівалі. Арцёма ўтрымлівалі ў ШІЗА больш за месяц. Там на яго адбылося нападзення з боку аднаго з хворых асуджаных.

Мужчына мусіў выйсці на свабоду ў канцы чэрвеня 2022 года, адбыўшы цалкам тэрмін, але яго зноў не выпусцілі, бо завялі новую “крыміналку” за абразу сілавіка. Летам 2022 года мужчыну прысудзілі яшчэ год калоніі. Выйшаў на волю ён толькі ў канцы вясны мінулага года.

Аляксандр Шарабайка

Вядомы культурыст з Глыбокага Аляксандр Шарабайка восенню 2023 года атрымаў паўтара года калоніі за “абразу Лукашэнкі”. Свой тэрмін палітвязень адбыў у Івацэвіцкай калоніі № 22.

Але гісторыя пераследу на гэтым не скончылася. 7 траўня яго зноў судзілі за “абразы” і “ўдзел у экстрэмісцкім фармаванні”. Пакуль праваабаронцы не паведамляюць, які тэрмін далі культурысту — справа разглядаецца ў закрытым рэжыме.