Вусені шаўкапрада пагражаюць цэлай вёсцы ў Маладзечанскім раёне

Вёска Канюхі ў Маладзечанскім раёне апынулася перад нечаканай пагрозай. Яе наваколлі атакавалі вусені няпарнага шаўкапрада. Пражэрлівыя істоты знішчаюць усю зеляніну на сваім шляху, перадае тэлеканал АНТ. Мясцовыя жыхары не могуць спыніць нашэсце традыцыйнымі метадамі барацьбы.

Нечаканая бяда прыйшла ў вёску сёлетняй вясной. З невялікімі садовымі дрэвамі вусені распраўляюцца за пару дзён, з дубамі і ліпамі — за тыдзень.

Вяскоўцы пабойваюцца чапаць вусеняў, бо першыя спробы сабраць шкоднікаў скончыліся жудаснай алергіяй. Ад яе не дапамаглі нават пальчаткі. Алергенныя валасінкі могуць выклікаць поўнае спыненне дыхання і смерць.
Навукоўцы запэўніваюць, што няпарны шаўкапрад — мясцовы жыхар. Раней ён сустракаўся пераважна на поўдні Беларусі, а цяпер мігруе і стаў размнажацца хутчэй. Адна з прычын — пацяпленне клімату.

Генеральны дырэктар навукова-практычнага цэнтра Нацыянальнай акадэміі навук Беларусі па біярэсурсах Алег Барадзін кажа, што змагацца можна або хімічным. або механічным спосабам. Але калі сітуацыя выйшла ў такую ​​стадыю, што вусені аб'елі наваколле вёскі, то працэс ужо даўгачасны.

Жыхары вёскі Канюхі просяць дапамогі на дзяржаўным узроўні. Абараніць сябе самі яны ўжо не здольныя.