Як “бандэраўцы” адпомсцяць Лукашэнку за дапамогу Пуціну ў вайне

Па падліках каманды “Беларускага Гаюна”, за 70 дзён вайны Расіі з Украінай з тэрыторыі Беларусі па Украіне была выпушчана 631 расійская ракета. Колькі было вылетаў з беларускіх аэрадромаў расійскіх самалётаў і верталётаў, якія лёталі бамбіць украінскія гарады, яшчэ не падлічылі. Ну і самае галоўнае: калі б беларускі рэжым не дазволіў расійскім вайскоўцам напасці на Украіну са сваёй тэрыторыі, яны б не дайшлі да Кіева і не захапілі б Бучу, Ірпень ды іншыя гарады. А што там рабіла гэта армія забойцаў, гвалтаўнікоў і зладзеяў, ужо ведае ўвесь свет.

Ці згодныя простыя ўкраінцы і ўкраінскія вайскоўцы з адмовай ад помсты і адмовай страляць па расійскіх вайскоўцах на беларускай тэрыторыі? Ці разумеюць ва Украіне, што беларусы не роўна Лукашэнка? Гандаль з беларускім рэжымам — ці апраўданы такі крок? На гэтыя ды іншыя пытанні адказвае сузаснавальнік і былы кіраўнік інфармацыйнага аддзялення партыі “Правы сектар”, экс-дэпутат Вярхоўнай Рады Украіны і сябра ўкраінскай дэлегацыі ў ПАСЕ, палітычны актывіст і баец Узброеных сіл Украіны Барыслаў Бярэза.