З пасёлка побач з ваенным аэрадром у расійскай Адыгеі эвакуявалі жыхароў
На аэрадроме "Ханская" дыслакуецца навучальная база Краснадарскага авіяцыйнага вучылішча / yugopolis.ru
Улады Адыгеі паведамляюць, што прыгарад Майкопа ноччу "падвергся нападу варожых беспілотнікаў". Ратавальнікі тушаць пажар. Што гарыць, улады не ўдакладняюць, паведамляюць толькі, што пацярпелых няма, а з пасёлка Радніковага эвакуююць жыхароў.
Рэсурс ASTRA са спасылкай на мясцовых жыхароў піша, што беспілотнікі атакавалі ваенны аэрадром, які размешчаны побач з Радніковым. "Атакавалі ваенны аэрадром дроны, там ідзе вайна сапраўдная", — прыводзіць рэсурс адно са сведчанняў. Ён таксама публікуе спадарожнікавыя здымкі, на якіх бачна, што пажар узнік побач з аэрадромам.
Аэрадром "Ханская" размешчаны ў 6 км на паўночны захад ад горада Майкопа. Там дыслакуецца 272-я навучальная авіяцыйная Полацкая ордэнаў Суворава і Кутузава база Краснадарскага вышэйшага ваеннага авіяцыйнага вучылішча.
