За аўтамабільны сігнал супраць УНС мінчука арыштавалі на 15 сутак
На 15 сутак арыштаваў суд Цэнтральнага раёна Мінска аўтамабіліста Паўла Падаляку, піша ТГ-канал "Вясна назірае".
11 лютага Павел сігналіў на праспекце Незалежнасці. Такую акцыю супраць Усебеларускага народнага сходу прапаноўвалі правесці некаторыя ТГ-каналы. Як распавядала Еўрарадыё, двух аўтамабілістаў за такія сігналы затрымалі ўчора ўдзень. Аднак увечары аўтобусы з дэлегатамі УНС раз'язджаліся пад бясконцыя сігналы аўтамабілістаў.
Каля 9-й гадзіны раніцы 12 лютага Падаляку каля цырка спыніў рэгуліроўшчык: нібыта, яму перадалі па рацыі, што мужчына падаў гукавы сігнал. Даішнік прапанаваў Паўлу праехаць у Цэнтральнае РУУС. А там на яго склалі пратакол, быццам ва ўнутраным дворыку ён адмовіўся прайсці ў РУУС, стаў упірацца нагамі і хапацца за форменнае абмундзіраванне міліцыянта. На яго склалі пратакол за непадпарадкаванне (арт. 23.4 КаАП). А потым прапанавалі падпісаць пратакол, што ён стаяў на праспекце Незалежнасці і выкрыкваў лозунгі.
Суддзя Дзмітрый Карсюк прызнаў Падаляку вінаватым у непадпарадкаванні міліцыі ды арыштаваў яго на 15 сутак.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
