За падтрымку вайны РФ супраць Украіны пад санкцыі ЗША трапілі кампаніі з РБ
Сяргей Тыцык расказвае пра сваю кампанію на міжнародным навукова-практычным форуме, 2023 год / bgaa.by
ЗША ўвялі санкцыі супраць соцень фізічных асоб і кампаній з Беларусі, Расіі, КНР, Турцыі і іншых краін за падтрымку вайны РФ супраць Украіны. У "чорны спіс" за падтрымку расійскага ВПК трапілі "Беларусьгуматэхніка" і яго выканаўчы дырэктар Алег Шпакаў, а таксама камерцыйны дырэктар Дзмітрый Манько, "КВАНД ИС" і яго дырэктар Сяргей Тыцык, "БАЗтьюб" і дырэктар Алена Пераселяк, "Завод СВТ" і дырэктар Валянцін Міклашэвіч, "Тэхналіт" і яго дырэктар Аляксандр Бадзяка.
Вядома, што кампанія Тыцыка — распрацоўшчык беспілотных тэхналогій. У Мінфіне ЗША адзначаюць, што беспілотныя тэхналогіі ад яе атрымала расійскае абароннае ведамства.
"Завод СВТ" — распрацоўшчык і вытворца электронных прылад, "БАЗтьюб" — вытворца гідрацыліндраў, труб, "Тэхналіт" — спецыялізаваны завод па вытворчасці камплектуючых і запасных частак да спецтэхнікі.
12 чэрвеня Святлана Ціханоўская сустрэлася ў Вашынгтоне з дарадцам па нацыянальнай бяспецы ЗША Джэйкам Саліванам. Гаворка ішла пра ўзмацненне ціску на рэжым Аляксандра Лукашэнкі.
