Жыхар Маладзечна загінуў на вайне ва Украіне, ён па кантракце ваяваў за Расію

Журналісты "Нашай Нівы" знайшлі беларуса, які загінуў на вайне за Расію. Хлопца завуць Віталь Чыбісаў, яму было 22 гады.

Пасля тэрміновай службы Віталь запісаўся па кантракце ў расійскае войска, каб ваяваць супраць украінцаў. Быў на перадавой. Дакладная дата яго смерці невядомая. Выданне мяркуе, што ён загінуў у перыяд паміж 26 і 28 лістапада 2023 года. Яшчэ 25 лістапада ён быў актыўны ў сацсетках. Абставіны гібелі Чыбісава таксама невядомыя. Пахавалі хлопца ў родным Маладзечне.

Віталь родам з простай сям'і. Маці, паводле базаў "Кіберпартызанаў", працавала прасавальніцай у мясцовай бальніцы, бацька — токарам. Але з бацькам, відаць, адносіны не складваліся — фотаздымкаў у сацсетках з ім ні ў Віталя, ні ў яго брата няма. Акрамя таго, у сацсетках яны карысталіся прозвішчам маці — Сокал.

Чыбісавы жылі ў інтэрнаце ў Маладзечне. Паводле базаў " Кіберпартызанаў", у падлеткавым узросце Віталь некалькі разоў трапляўся на крадзяжах: ва ўзросце 11 гадоў забраў чужы смартфон, а ў 13 выкраў два ровары і смартфон проста на працы ў маці.