Знешняй палітыкай і абаронай Еўрасаюза зоймуцца прадстаўнікі краін Балтыі
Еўрасаюз, ілюстрацыйнае фота
Еўрапарламент зацвердзіў новы склад Еўракамісіі. Пасаду старшыні захавала прадстаўніца Германіі Урсула фон дэр Ляен.
Другую па статусе пасаду — Вярхоўнага прадстаўніка ЕС па знешніх зносінах і палітыцы ў галіне бяспекі і віцэ-старшыні Еўракамісіі — заняла Кая Калас. Гэта былая кіраўніца ўрада Эстоніі, вядомая як адна з самых гарачых прыхільніц Украіны сярод еўрапейскіх палітыкаў.
Пасаду камісара абароны і космасу таксама заняў прадстаўнік Балтыі — гэта былы прэм'ер-міністр Літвы Андрус Кубілюс.
А экс-кіраўнік урада Латвіі Валдзіс Дамброўскіс у новым складзе Еўракамісіі стаў камісарам па эканоміцы і прадукцыйнасці.
Агулам у Еўракамісію ўваходзяць 27 чалавек — па адным прадстаўніку ад кожнай з краін Еўрасаюза.
Новы ўрад ЕС пачне сваю працу з 1 снежня.
