Адхілены ад пасады намеснік кіраўніка ААЦ увайшоў у іншую камісію
Месяц таму, 13 кастрычніка, Аляксандр Лукашэнка заявіў, што ўсё кіраўніцтва Аператыўна-аналітычнага цэнтра адхіленае ад сваіх пасадаў. На даручэнне кіраўніка дзяржавы працавала камісія, якая вывучала дзейнасць ААЦ і мае прэтэнзіі да яго кіраўніцтва. Па словах Лукашэнкі, ідзе расследаванне выяўленых фактаў, а да канца расследавання ад пасадаў адхіленыя кіраўнікі службы: начальнік ААЦ Сяргей Шпягун, намеснікі — Генадзь Бялкоў і Канстанцін Шульган.
Нагадаем, што ААЦ з'яўляецца рэгулятарам інтэрнэту ў Беларусі.
Аднак выявілася, што прынамсі Канстанцін Шульган увайшоў у іншую дзяржаўную камісію, створаную ў нашай краіне. Сваім указам №413 Лукашэнка стварыў Міжведамасную камісію па бяспецы ў інфармацыйнай сферы. Адным з яе чальцоў прызначаны... Шульган — як намеснік начальніка ААЦ.
Дарэчы, сярод тых, хто будзе дбаць пра бяспеку ў інфармацыйнай сферы, ёсць і міністр абароны Андрэй Раўкоў.
Сам указ абнародаваны на Нацыянальным прававым інтэрнэт-партале.
