Аўтамабільнае паліва ў Беларусі падаражэе на 5-10%
Гэтае рашэнне абмяркоўваецца ва ўрадзе і, як чакаецца, можа быць прынятае ў самы бліжэйшы час.
Газета "Белорусы и рынок" адзначае, што сёлета канцэрн "Белнафтахім" некалькі разоў уносіў ва ўрад прапановы аб неабходнасці павысіць цэны на аўтамабільнае паліва. Аднак рашэнне адкладвалася. Адна з верагодных прычын — нядаўні хакейны чэмпіянат свету ў Мінску.
Нагадаем, у апошні раз цэны на паліва ў Беларусі павышаліся 28 снежня 2013 года, у сярэднім на 2%.
Чакаецца, што ў бліжэйшы час цэны на аўтамабільнае паліва могуць павялічыцца як мінімум на 5%. Аднак паралельна абмяркоўваецца пытанне аб павышэнні акцызнага падатку на аўтамабільнае паліва. Калі такое рашэнне будзе прынята, то цэннікі на АЗС могуць змяніцца больш адчувальна — у межах 10%.
Фота — ria.ru
