Баптысцкага прэсвітара на Брэстчыне аштрафавалі за праведзены абрад хрышчэння
Чальцы баптысцкай царквы прыйшлі падтрымаць пастара (ён з кветкамі) да будынка суда ў 2023 годзе / t.me/christianvision
У Брэсцкай вобласці пад рэпрэсіі трапіў баптысцкі прэсвітар, піша "Хрысціянская візія".
71-гадовы Уладзімір Бурштын — прэсвітар царквы з Міжнароднага саюза цэркваў евангельскіх хрысціян-баптыстаў. Летась яго аштрафавалі на 555 рублёў за пропаведзь у Драгічыне.
Сёлета нагодай для штрафу стала... хрышчэнне. 8 верасня Уладзімір Бурштын правёў набажэнства ў царкве Маларыты каля вадаёма "Ваеннае возера". Дзевяць чалавек прынялі воднае хрышчэнне. А праз месяц на пастара склалі пратакол на падставе запісаў з камер відэаназірання.
6 лістапада суд Маларыцкага раёна аштрафаваў яго на 800 рублёў (20 базавых). Пастара прызналі вінаватым у правядзенні масавага мерапрыемства без узгаднення з адміністрацыяй Маларыцкага райвыканкама.
Прэсвітар будзе абскарджваць штраф у Брэсцкім абласным судзе.
