Байдэн абяцае прыцягнуць Расію да адказнасці за яе дзеянні ва Украіне
Джо Байдэн і Эманюэль Макрон / Associated Press
Прэзідэнт ЗША Джо Байдэн разам з прэзідэнтам Францыі Эманюэлем Макронам поўныя рашучасці прыцягнуць Расію і Уладзіміра Пуціна да адказнасці за яго "вайну з астатнім светам".
Пра гэта Байдэн заявіў на прэс-канферэнцыі ў Белым доме, перадае Бі-Бі-Сі. Яна прысвячалася дзяржаўнаму візіту французскага прэзідэнта.
"Пуцін думае, што можа зламаць волю ўсіх тых, хто выступае супраць яго імперскіх амбіцый. Але напад на грамадзянскую інфраструктуру ва Украіне, перакрыцце энергазабеспячэння Еўропы з мэтай уздымання цэн, абвастрэнне харчовага крызісу наносіць шкоду вельмі уразлівым людзям — не толькі ва Украіне, але і ва ўсім свеце. І ў яго нічога не атрымаецца", — заявіў Байдэн пасля двухбаковай сустрэчы.
Ён паведаміў, што дамовіўся з Макронам працягваць сумесную працу па прыцягненні Расіі да адказнасці за свае дзеянні. Таксама дзейнасць ЗША і Францыі будзе скіраваная на тое, каб змякчыць "наступствы пуцінскай вайны для астатняга свету", паведаміў Байдэн.
