Больш за 30 аўто забрала транспартная інспекцыя за парушэнне ўказа пра таксі

Транспартная інспекцыя з пачатку лістапада канфіскуе аўтамабілі пры парушэнні новых правілаў пасажырскіх перавозак.

"Ужо канфіскавана больш за 30 транспартных сродкаў", — заяўляе ў каментары агенцтву "Мінск-навіны" намеснік начальніка Транспартнай інспекцыі Міністэрства транспарту і камунікацый Дзмітрый Кулікоўскі.

Ад 1 лістапада ў Беларусі пачаў дзейнічаць рэестр перавозчыкаў. У яго ўвашлі маршрутчыкі, таксоўкі, дыспетчары, кіроўцы аўтобусаў і легкавых аўтамабіляў. Легальна працаваць могуць толькі тыя, хто трапіў у гэты спіс.

У выніку колькасць таксоўцаў у Беларусі скарацілася на чвэрць (у Мінску — на 35%). Пацярпелі ад гэтага і спажыўцы: выраслі цэннікі і час чакання заказу.