Чаму Бэкхэм мусіць мадэраваць дэбаты кандыдатаў у прэзідэнты — #Іх Норавы

Прызавы фонд прэміі міру — больш за 990 тысяч долараў ЗША. А яшчэ прэмія імгненна прыкоўвае ўвагу да яе лаўрэата. Напрыклад, у 1984 годзе яе прысудзілі паўднёваафрыканскаму арцыбіскупу Дэсманду Туту. Ён тады сказаў:

"Яшчэ ўчора ніхто не чуў. А на наступны дзень я стаў аракулам".

Зрэшты, сёлета галасы іранскіх жанчын былі добра чуваць і да таго, як на іх звярнуў увагу Нобелеўскі камітэт.

Муры рухнуць?

Памятаеце, як усе здзекаваліся з Дональда Трампа праз яго планы пабудаваць сцяну на мяжы з Мексікай? Тады вас пацешаць апошнія навіны: адміністрацыя Джо Байдэна абвясціла пра будаўніцтва сцяны на мяжы з Мексікай!

Падчас перадвыбарчай кампаніі ў 2020 годзе Байдэн абяцаў, што не пабудуе ні метра сцяны і лічыць узвядзенне сцен "несур'ёзным палітычным рашэннем".

Прэзідэнта раскрытыкавалі адразу і дэмакраты, і рэспубліканцы. Дэмакраты — бо ўпэўненыя, што сцены не працуюць у барацьбе з нерэгулярнай міграцыяй. Рэспубліканцы — бо лічаць такое рашэнне крывадушным (і памятаюць, як здзекаваліся над Трампам з нагоды сцяны).

Сам Трамп сказаў: гэта будаўніцтва паказала, што "я меў рацыю".

Сітуацыя з нерэгулярнай міграцыяй на паўднёвай мяжы штатаў сапраўды няпростая. Паводле апошніх звестак, памежны патруль ЗША затрымаў там у жніўні больш за 180 тысяч чалавек — а ў ліпені больш за 130 тысяч.

Але ўсё не так проста. У тым, што сцяну ўсё ж будуць будаваць, вінаваты нібыта Кангрэс. У адміністрацыі Байдэна кажуць, што фінансаванне новага памежнага бар'ера было ўзгодненае ў 2019 годзе, падчас прэзідэнцтва Трампа. І ў 2021 годзе Байдэн спрабаваў ануляваць вылучэнне сродкаў на гэтае будаўніцтва — але кангрэсмены адмовіліся.

"І мы вымушаныя прытрымлівацца закона", — кажа міністр унутранай бяспекі Алехандра Маёркас.

"Вымушаныя прытрымлівацца закона" — якія нязвыклыя для беларускага вуха словы.

Так працягвацца не можа

Еўропу міграцыйны крызіс таксама трывожыць, але чым бліжэйшыя выбары ў асобных краінах — тым навейшым становіцца погляд на гэты крызіс.

У 2015 годзе Германія адкрыла дзверы тым, хто просіць прытулку, ратуючыся ад вайны і нягодаў. Але цяпер настроі змяніліся, і самыя розныя партыі наперабой шукаюць механізмы, якія стрымлівалі б нерэгулярную міграцыю.