Чаму стаіць завод у Светлагорску, за які Лукашэнка адчытаў чыноўнікаў

У снежні 2017 года на базе Светлагорскага цэлюлозна-кардоннага камбіната зрабілі завод па вытворчасці сульфатнай беленай цэлюлозы магутнасцю 400 тысяч тон у год. Той самы, супраць будаўніцтва якога, мясцовыя жыхары яшчэ ў 2012 годзе сабралі 10 тысяч подпісаў.

Пратэсты не паўплывалі на рашэнне ўладаў — хоць тэрміны пастаянна пераносіліся, у снежні завод выпусціў першыя сто тон сыравіны. Але, прапрацаваўшы тры месяцы, прадпрыемства спынілася. У сваім штогадовым пасланні Аляксандр Лукашэнка адчытаў за гэта чыноўнікаў: "Ва ўрадзе дагэтуль разбіраюцца, хто перад прэзідэнтам за гэта адкажа".

Другі па кошце пасля АЭС

"Кіраўнік дзяржавы акцэнтуе ўвагу на гэтым праекце, таму што ён з'яўляецца другім па кошце пасля Беларускай АЭС, — тлумачыць дырэктар Светлагорскага цэлюлозна-кардоннага камбіната Юрый Крук. — Яго кошт — $800 млн [будаўніцтва АЭС пад Астраўцом абыдзецца Беларусі прыблізна ў $10 млрд. — Еўрарадыё]. Калі прадпрыемства запрацуе, мы зможам перапрацоўваць беларускую драўніну, якая раней у круглым выглядзе вывозілася на экспарт.

Драўніна вывозілася па 40 еўра за кубаметр. На тону цэлюлозы будзе сыходзіць парадку пяці "кубоў" драўніны. А кошт цэлюлозы сёння — каля $800 за тону. Вось і лічыце! На заводзе будуць працаваць каля 400 чалавек. 150 тысяч долараў — прыблізная выручка на аднаго работніка".

Паводле слоў спецыяліста, сёння ў Беларусі ўсе віды паперы вырабляюцца з сыравіны, прывезенай з Расіі і Еўрасаюза. Светлагорскі завод будзе выкарыстоўваць беларускую драўніну. Але чаму ж тады ён папрацаваў ўсяго тры месяцы?

Проста паспрабавалі

Юрый Крук распавёў, што афіцыйнага адкрыцця завода пакуль не было. Тры месяцы працы, якія згадаў Лукашэнка ў сваім пасланні, гэта ўсяго толькі эксперымент:

"Мы запусцілі пробную вытворчасць. Выпусцілі каля трох тысяч тон прадукцыі. Частка была накіраваная па прадпрыемствах нашага канцэрна на перапрацоўку. Там яе пратэставалі спецыялісты і далі добрую адзнаку. Прадукцыю з яе рэалізавалі кліентам. Таксама мы зрабілі першыя адгрузкі уласна цэлюлозы ў Германію, Кітай і Расію.

Сёння прадпрыемства цалкам забяспечанае сырцом і хімікатамі, і не працуе толькі таму, што пакуль не падпісаныя дадатковыя пагадненні аб аднаўленні работ з кітайскім бокам".

Запуск завода тармозяць... кітайцы

Па словах дырэктара камбіната, сёння запуск вытворчасці ляжыць выключна ў зоне адказнасці кітайскага падрадчыка, карпарацыі САМСЕ.

"З лютага па сакавік кітайскія спецыялісты былі на навагодніх канікулах, — працягвае Юрый Крук. — Цяпер з імі вядуцца перамовы аб аднаўленні далейшага пуску завода, каб да канца года вывесці яго на бесперапынны рэжым працы і выйсці на магутнасці, якія пазначаныя праектам".

Дырэктар камбіната таксама патлумачыў, чаму зацягнулася будаўніцтва прадпрыемства:

"Завод сучасны, там устаноўленае еўрапейскае абсталяванне. Прыйшлося рабіць шмат узгадненняў і адаптаваць праектныя дакументацыі пад нашы нормы і патрабаванні. Ёсць пытанні, якія былі цалкам адкарэктаваныя. Адаптацыя завяршылася толькі ў мінулым годзе — гэта дазволіла рухацца далей".

Па словах Юрыя Крука, усе пытанні павінны быць вырашаныя да канца 2018 года.