Чэхія спросціць выдачу візаў сваякам беларусаў, якія жывуць у краіне

Чэхія спросціць візавы рэжым і выдачу візаў сваякам беларусаў, якія пражываюць у краіне. Адпаведнае афіцыйнае рашэнне будзе апублікаванае бліжэйшым часам.

Пра гэта падчас сустрэчы са Святланай Ціханоўскай паведаміў міністр замежных справаў Чэхіі Петр Мацінка. Як адзначае прэс-служба лідаркі беларускіх дэмсілаў, сустрэча прашла ў Місіі дэмакратычных сіл Беларусі ў Празе, а не ў чэшскім МЗС, што стала асаблівым жэстам падтрымкі беларускіх дэмакратычных сілаў і беларускага народа.  

Дамоўленасць пра спрашчэнне візавага рэжыму была дасягнутая падчас папярэдняга візіту Ціханоўскай у Чэхію.

Падчас цяперашняй сустрэчы абмяркоўваліся наступныя пытанні:
— ваенна-палітычная сітуацыя ў рэгіёне; 
— вызваленне палітычных зняволеных;
— падтрымка рэпрэсаваных беларусаў;
— магчымасць далучэння Чэхіі да Міжнароднага гуманітарнага фонду; 
— магчымасць прызначэння асобнага спецпасланніка па супрацоўніцтве з дэмакратычнымі сіламі Беларусі;
— пытанні міжнароднай адказнасці рэжыму Лукашэнкі за злачынствы супраць чалавечнасці і саўдзел у ваенных злачынствах.