Член Савета Рэспублікі: трэба даваць сумленную статыстыку па каранавірусе

Па словах Суконкі, праз статыстыку кавідных хворых у яго быў канфлікт з абодвума міністрамі аховы здароўя — і Уладзімірам Каранікам, і Дзмітрыем Піневічам.

"Я пытаўся: дзе канферэнцыя па выніках першай хвалі каранавіруса? Чаму не правялі, не патлумачылі, не зрабілі высновы? Гэта самае важнае — зрабіць высновы, пазначыць праграму, зразумець, што рабіць далей. Каранавірус нікуды не дзенецца. Значыць, павінна быць дзяржпраграма маштабная, якая ўключае будаўніцтва, перабудову, рамонт усіх інфекцыйных лякарняў. І штаб павінен узначальваць галоўны эпідэміёлаг краіны, дырэктар РНПЦ эпідэміялогіі, якога не чуваць і не відаць", — абураецца прафесар Суконка. 

Паводле афіцыйнай статыстыкі, у Беларусі за час пандэміі памерлі толькі 1737 пацыентаў з каранавіруснай інфекцыяй. Між тым, статыстыка ЗАГСаў сведчыць, што ў 2020 годзе смяротнасць у краіне істотна павялічылася ў параўнанні ў 2019-м.

Доктар лічыць, што праблемай каранавіруса неабходна займацца сур'ёзна. У тым ліку — праверыць, ці будзе расійская вакцына дзейнічаць на той штам, які цыркулюе ў нас. "Не ведаю, можа, і Лукашэнку пра мае словы далажылі, але пасля гэтага майго выступу са мной сталі неяк холадна вітацца", — прызнаецца лекар. 

Праўда, да прапановы агучыць гэтую праблему на Усебеларускім народным сходзе, дзе ён будзе ўдзельнічаць, Суконка паставіўся асцярожна: "А ці варта?.."