ЦВК адмяніў рэгістрацыю ініцыятыўных груп астравецкага актывіста АГП

Пра гэта Мікола Уласевіч паведаміў Еўрарадыё адразу па заканчэнні адмысловага пасяджэння Цэнтрвыбаркама, якое праходзіла 21 студзеня.

Мікола Уласевіч: “Як я ім ні даказваў, што яны не маюць права так рабіць, бо самі напісалі ў сваіх метадычных рэкамендацыях, у артыкуле 10.2, што Выбарчы кодэкс не прадугледжвае адмены рэгістрацыі ініцыятыўных груп, тым не менш, [старшыня Цэнтрвыбаркама] Ярмошына кажа: “Парушэнне было падчас рэгістрацыі і мы проста аднаўляем законнасць”.

Нагадаем, у адпаведнасці са зменамі, унесенымі ў Выбарчы кодэкс восенню 2013 года, вылучацца кандыдатам у дэпутаты прэтэндэнт можа толькі ў адной выбарчай акрузе, а не ў некалькіх, як было раней. Праўда, пра колькасць ініцыятыўных груп у Кодэксе нічога не гаворыцца, але з ЦВК лічаць, што гэта не патрабуе ўдакладненняў: калі вылучацца можна па адной акрузе, то і групу рэгістраваць можна толькі адну — у гэтай жа акрузе.

Рэгістрацыя ініцыятыўных груп завяршылася 16 студзеня. Але паўдзельнічаць у выбарах Мікола Уласевіч яшчэ можа — у пасялковы савет і ў абласны. Туды яго можа вылучыць партыя — “паводле партыйнага спісу”.

Рашэнне ЦВК актывіст плануе абскардзіць у Вярхоўным судзе.
 

Фота — bymedia.net