Дэпутат ПП з Гомеля спачатку вырашыў вылучацца на новы тэрмін, а потым знік
Ігар Завалей (у цэнтры) адкрывае новую краму ў Добрушы ў снежні 2023 года / vdobrushe.by
Са спісу кандыдатаў у дэпутаты Палаты прадстаўнікоў раптоўна знік дзейны дэпутат ад Гомельскай сельскай акругі №37 Ігар Завалей. Хаця ў снежні 2023 года ён ужо зарэгістраваў ініцыятыўную групу па зборы подпісаў для свайго вылучэння кандыдатам, нават правёў некалькі паказальных мерапрыемстваў, піша "Флагшток". Завалей пад камеры падарыў тэлевізар прытулку і адкрыў краму ў Добрушы. Але з канца 2023 сацсеткі дэпутата перасталі абнаўляцца.
Блогер Андрэй Павук звязаўся з памочнікам дэпутата і спытаў, чаму Ігар Завалей перадумаў балатавацца.
"Ігару Уладзіміравічу прапанавана прадоўжыць дзейнасць на іншай рабоце", — адказаў памочнік дэпутата. Якую менавіта працу прапанавалі Завалею, памочнік адказаць не змог, сказаў, што зараз абмяркоўваецца некалькі варыянтаў прызначэння.
Выданне нагадвае, што Ігар Завалей родам з расійскага Сургута. Да "абрання" ў парламент узначальваў Гомельскі абласны камітэт БРСМ.
