Дзве групы нелегальных мігрантаў затрымалі ў Гродне
У Гродне затрымалі нелегальных мігрантаў / grodnoplustv.by
У Гродне затрымалі дзве групы нелегальных мігрантаў. Як перадае "Гродна Плюс", іх вылічылі ўчастковыя інспектары міліцыі.
У адным з выпадкаў міліцыю выклікалі жыхары шматпавярховіка, у якіх узнік канфлікт з замежнымі гасцямі.
Як кажа намесніца начальніка аддзела па грамадзянстве і міграцыі Кастрычніцкага РУУС Гродна Лілія Краўчук, нелегальных мігрантаў дэпартавалі. Тры чалавекі затрыманыя для высвятлення асобаў. Іх пасадзілі ў ІЧУ.
"Выяўленыя парушэнні міграцыйнага заканадаўства сярод грамадзян Туркменістана, Узбекістана і Таджыкістана. Замежныя грамадзяне прыцягнутыя да адміністрацыйнай адказнасці. Штраф накладзены ў суме больш за 1300 беларускіх рублёў", — заяўляе Краўчук.
Як распавядала Еўрарадыё, на днях амаль сто мігрантаў былі затрыманыя ў аграгарадку Міханавічы пад Мінскам.
Раней беларускія ўлады заахвочвалі мігрантаў з Азіі і Афрыкі прыязджаць у Беларусь, каб потым ісці далей у ЕС. Аднак апошнія падзеі сведчаць пра перамену ў гэтай палітыцы.
