Дзве навапалачанкі абакралі пяцярых пенсіянераў на 50 мільёнаў рублёў
Упраўленне Следчага камітэта па Віцебскай вобласці завяршыла расследаванне крымінальнай справы супраць дзвюх жыхарак горада Наваполацка.
На працягу трох тыдняў увосень 2015 года пенсіянеры Полацкага раёна паведамлялі праваахоўнікам пра крадзяжы ў іх дамах. Перад гэтым іх наведвалі дзве жанчыны, якія называліся работніцамі розных дзяржаўных структур, якія аказваюць дапамогу састарэлым грамадзянам. Адным жанчыны гаварылі, што правяраюць праводку і электрычны лічыльнік. Другім — што яны работніцы страхавой кампаніі альбо сацыяльныя работніцы.
У доме адна з госцяў гаварыла з гаспадарамі, а другая абшуквала дом, шукаючы грошы і каштоўнасці. Забраўшы грошы і каштоўнасці, жанчыны спешна развітваліся з пацярпелымі і сыходзілі.
Па падазрэнні праваахоўнікі затрымалі 34- і 35-гадовую жыхарак Наваполацка. Падчас следства выявілася, што махляркі абакралі дамы пяцярых пенсіянераў. Узрост пацярпелых — ад 72 да 91 года. Усе яны пражывалі самотна, іх дамы размяшчаліся ў прыватным сектары.
Жанчын вінавацяць у крадзяжы, учыненым паўторна, групай асобаў, з пранікненнем у жыллё, у буйным памеры. Адна з іх, як паведамляецца, мае чатыры судзімасці за маёмасныя злачынствы. Пацярпелым пенсіянерам часткова кампенсавалі шкоду, нанесеную злачыннымі дзеяннямі абвінавачаных.
Крымінальная справа перададзеная пракурору для накіравання ў суд.
