Дзярждэпартамент ЗША — пра выбары ў Беларусі: ёсць сурʼёзныя пытанні | Навіны Беларусі

Дзярждэпартамент ЗША пракаментаваў вынікі выбараў у Палату прадстаўнікоў Нацыянальнага сходу Беларусі. Як вядома, у ёй не будзе апазіцыянераў. У заяве прэс-сакратара Дзярждэпа Морган Артагус адзначана "мірнае правядзенне" выбараў і прысутнасць на іх вялікай колькасці назіральнікаў.

Адначасова вынікі выклікалі заклапочанасць у Бюро па дэмакратычных інстытутах і правах чалавека АБСЕ, Парламенцкай асамблеі АБСЕ, Савета Еўропы. Заходнія місіі назіральнікаў прыйшлі да высновы, што "фундаментальныя свабоды былі праігнараваны і сумленнасць выбарчага працэсу не была адэкватна абаронена".

"Мы выказваем шкадаванне, што альтэрнатыўныя галасы не будуць прадстаўлены ў парламенце", — гаворыцца ў заяве Дзярждэпартамента ЗША. У ёй таксама адзначаецца, што "да парламенцкіх выбараў у Беларусі ёсць сурʼёзныя пытанні". Гэта і перашкоды ў рэгістрацыі кандыдатаў у дэпутаты, і сумненні ў сумленнасці датэрміновага галасавання, і непразрыстасць сістэмы падліку галасоў. А яшчэ Дзярждэп згадвае адсутнасць плюралізму ў складзе выбарчых камісій ды шмат іншага.

У выніку Злучаныя Штаты канстатуюць, што ў выбарчым працэсе ў Беларусі "не адбылося змястоўных зменаў". Вашынгтон заклікаў улады нашай краіны "правесці сур'ёзную рэформу свайго выбарчага закону і выбарчага працэсу".