Дзяржкантроль аштрафаваў "Лідскае піва" на 12 мільёнаў еўра

Па выніках праверкі Камітэт дзяржкантролю аштрафаваў ААТ "Лідскае піва" на 35,8 мільёна рублёў (12 мільёнаў еўра паводле курсу Нацбанка на 20 лютага), піша Office Life. Кампанія не пагадзілася са штрафам і аспрэчвае яго ў раённым судзе. Мяркуецца, што судовае разбіральніцтва можа зацягнуцца на некалькі месяцаў.

У 2021 годзе чысты прыбытак "Лідскага піва" склаў 38 млн рублёў (12,6 мільёна еўра паводле сярэдняга курсу еўра за 2021 год). Прыкладна столькі ж патрабуе заплаціць Дзяржкантроль.

У сувязі з няпэўнай сітуацыяй матчына кампанія "Лідскага піва" фінская Olvi адмяняе свой фінансавы прагноз, апублікаваны 10 лютага, і не будзе публікаваць новы.

У папярэднім прагнозе гаварылася, што за 2023 год чакаецца прыбытак ніжэйшы, чым у 2022-м. Гэта звязана з вайной ва Украіне і ўплывам абменных курсаў. Пры гэтым кампанія меркавала, што аб'ёмы продажаў і выручкі будуць расці.

У ліпені 2022-га "Лідскае піва" паводле пастановы ўрада трапіла ў спіс беларускіх кампаній, якія іх замежным уладальнікам прадаваць забаронена. Спярша Olvi Group усё ж спадзявалася пазбыцца беларускага актыву, але ў лістападзе прызнала, што зрабіць гэта немагчыма. У тым жа месяцы Аляксандр Лукашэнка заявіў, што замежны бізнес не зможа прадаць беларускія актывы і сысці — у такім разе гэты бізнес будзе нацыяналізаваны.