Дзяржсакратар ЗША: мы разглядаем розныя інструменты ўздзеяння на Беларусь
Энтані Блінкен / state.gov
ЗША разглядаюць розныя варыянты ўздзеяння на Беларусь у святле міграцыйнага крызісу, заявіў дзяржсакратар ЗША Энтані Блінкен на брыфінгу, паведамляе РІА Навіны.
"Мы занепакоеныя высілкамі Беларусі, якая выкарыстоўвае міграцыю ў якасці палітычнай зброі. Я не буду апярэджваць магчымыя санкцыі, але мы разглядаем розныя інструменты, якія ў нас ёсць", — сказаў Блінкен.
Дзяржсакратар падкрэсліў, што ЗША кансультуюцца з еўрапейскімі партнёрамі па гэтых пытаннях.
Як паведамляла Еўрарадыё, ЕС на працягу наступнага тыдня завершыць узгадненне дадатковых санкцый супраць Беларусі з-за сітуацыі з мігрантамі на мяжы. Раней афіцыйная прадстаўніца МЗС Нямеччыны Андрэа Засэн заявіла, што кіраўнікі МЗС ЕС плануюць у панядзелак 15 лістапада абмеркаваць пашырэнне санкцый у дачыненні да Мінска.
