Экс-дацэнта МДЛУ Наталлю Дуліну асудзілі на 3,5 года калоніі
Наталля Дуліна / svaboda.org
У Мінскім гарадскім судзе агучылі прысуд экс-дацэнтцы МДЛУ Наталлі Дулінай. Ёй далі 3,5 года калоніі. Яе абвінавачвалі паводле двух артыкулаў КК: удзел у пратэстах (арт. 342) і садзейнічанне экстрэмісцкай дзейнасці (арт.361-4).
Суд над былой дацэнткай лінгвістычнага ўніверсітэта быў закрытым. Відавочцы, якіх пусцілі на абвяшчэнне прысуду, кажуць, што Дуліна была ў кайданках.
Былую выкладчыцу МДЛУ затрымалі ў пачатку кастрычніка 2022 г. у рамках крымінальнай справы. У тым годзе яе затрымлівалі некалькі разоў, але раней судзілі паводле палітычна матываваных адміністрацыйных артыкулаў. У 2020-м Наталля Дуліна падтрымала страйк і пратэсты студэнтаў. Тады яе першы раз арыштавалі за ўдзел у несанкцыянаваным мерапрыемстве і звольнілі з універсітэта.
Праваабаронцы прызналі Наталлю Дуліну палітзняволенай.
