Экс-кіраўнік Камітэта нацбяспекі Казахстана асуджаны на 18 гадоў зняволення
Карым Масімаў / vlast.kz
Экс-кіраўнік Камітэта нацбяспекі Казахстана (галоўнай спецслужбы краіны), былы прэм'ер Карым Масімаў асуджаны на 18 гадоў зняволення. З канфіскацыяй маёмасці і з пажыццёвай забаронай займаць пасады на дзяржаўнай службе. Яго прызналі вінаватым у спробе дзяржперавароту, дзяржздрадзе і перавышэнні службовых паўнамоцтваў, паведамляе vlast.kz.
Масімава затрымалі ў студзені 2022-га падчас масавых выступленняў у Казахстане. Пад суд трапілі і яго намеснікі, якія атрымалі 3, 15 і 16 гадоў зняволення. Працэс праходзіў з лістапада ў закрытым рэжыме.
Усіх асуджаных пазбавілі генеральскіх званняў і ўзнагарод.
Карым Масімаў лічыўся блізкім паплечнікам экс-прэзідэнта Нурсултана Назарбаева, які ў выніку студзеньскіх падзей 2022-га страціў увесь уплыў і ўладу. У Казахстане прайшлі чысткі палітычных і бізнес-элітаў.
